中環出更：楊岳橋歐洲秘婚 粉絲心碎
立法會議員楊岳橋（Alvin）一向多粉絲，佢今年年頭宣布向女友求婚成功時，已經令一眾少女心碎。當時佢話年底就會正式拉埋天窗，但遲遲都未公布細節，估唔到佢近日已經靜靜雞遠赴歐洲註冊結婚，更加透過其議員辦事處「810扮工室」專頁公布婚訊。唔少網民都留言恭喜兩人，但亦都有人打趣問「咦！？唔係鵝姐（陳玉娥）嚟架喂」。
對感情事一向低調嘅Alvin，年頭爆出喺挪威嘅「北極光」之旅嗰陣，向拍拖多年嘅事務律師女友Eve求婚成功，震撼整個政界。當時Alvin透露年底正式拉埋天窗，婚禮就希望低調進行。原來對外聲稱去歐洲旅行嘅Alvin，已經蠱蠱惑惑喺丹麥簽字註冊結婚，畀卓妮踢爆後佢就立即透過議辦專頁公布婚訊。
網民：點解新娘唔係陳玉娥
貼文入面有楊生楊太簽字後嘅相，兩個人戴上戒指玩自拍，既搞笑又甜蜜。唔少網民都留言恭喜兩人，祝佢哋「三年抱兩」，不過亦有人話「聽到好多碎裂嘅聲音」，更加有人打趣問，點解新娘唔係「娥頸橋」之戀中嘅女主角陳玉娥喎。據聞佢哋希望婚禮低調處理，喺歐洲行完禮後，今年底會喺香港補辦雞尾酒會，但應該唔會擺酒。
卓妮