中環出更：嚴子杰湊女經嘆幼園多家長群組
唔少父母聚埋一齊，就自自然會交流育兒心得。早前喺香港工業總會青年委員會嘅一個活動上，卓妮就見到唔少年輕父母，其中三歲囡囡啱啱返幼稚園嘅工總青委嚴子杰（Jacky）就大嘆，社會上真係有唔少怪獸家長，佢嘅大女啱啱返幼兒班，家長通訊群組竟然已有近廿個，有啲仲用作討論升小學問題添，認真誇張。
Jacky話，囡囡最近因病錯過學校開學禮，但一眾家長已經開設近二十個群組，有啲群組只開放畀指定校網嘅家長加入，仲要提供住址證明先至可以加入添！Jacky話，一班小朋友只係啱啱升讀幼兒班，但家長已經咁緊張，難怪佢大嘆家長做法誇張，好似怪獸喇！
劉燊濤大仔初返學 喊足成個月
當日出席活動嘅係新一屆工總青委成員，包括「中國變形金剛之父」林亮嘅外孫陳允誠（Bryant），佢接替劉燊濤（Gary）出任青委主席，副主席就係劉子芸同許文俊。講起湊仔經，呢班年輕父母都各有心得。青委成員許穎嘉嘅囝囝啱啱六個月大，佢話品格教育緊要啲。有兩個囝囝嘅Bryant就話自己係屋企嘅娛樂總監，喺啱啱過去嘅暑假，屋企就買咗新遊戲機，三父子打機增進感情，至於學業、責罵工作就交畀太太喇！
Gary直言唔鼓勵囝囝玩電子產品，但都唔可以完全唔用，因為電子產品猶如奶嘴，有時同囝囝外出用膳時畀佢玩吓，可以避免扭計喎。Gary仲話，大仔返幼稚園近一個月，但就喊足咁耐，不過呢啲係來自佢嘅遺傳，事關佢細個初初返學時喊足三個月添。
卓妮