功夫茶今日想同大家討論吓「放生」嘅禍害──不過就唔係講司法保護傘放生漢奸黎同「長毛」呢筆，而係想奉勸大家千祈唔好亂咁將動物放歸大自然，否則救命變攞命，好心做壞事就唔好喇。
盂蘭節將近，又係信眾超度放生嘅旺季，特別係初一、十五，上水梧桐河一帶嚟放生嘅市民更加絡繹不絕。本報記者實地視察發現，朝早八點已經人頭湧湧，有魚販將十袋半個人高、裝滿田雞同巴西龜等嘅透明膠袋分發畀善信，結果一個鐘唔夠部分魚類已經魂歸天國，條河仲傳出陣陣臭味，你話係咪大吉利是吖。
嗱，聽吓專家點講喇。魚類喺運送過程中好容易受傷，受細菌感染或者唔適應水質都可能致死；更加大鑊嘅係，如果放生魚類係外來品種兼夾生命力超強，隨時有可能「反客為主」，影響本地物種協調同制衡，萬一放生數量過多，仲可能大大影響生物多樣性添！
話時話，胡亂放生動物已經唔係今時今日嘅事，立法會議員同動保人士亦一早敦促當局做嘢，可惜官老爺一係好似張三丰上身，環保署推畀漁護署，漁護署推畀渠務署，一係就大打官腔，話會加強公眾教育，提升市民對放生活動嘅關注，結果係點大家有目共睹。淨係舊年之嘛，兩個月內就發生四宗亂放生慘劇，總共三百幾隻淡水巴西龜被錯誤放入鹹水海，數量之多史無前例。官僚靠得住，豬乸會上樹，真係幾時都冇講錯。
廣告都有教喇，借錢梗要還，咪畀錢中介，其實放生都係一樣。英國威爾斯一名漁夫日前成功釣到一條超過七呎長、重逾五百磅嘅藍鰭吞拿魚，破晒當地紀錄，結果都係影張相，放上網開心「些牙」就算，呢啲先至係名副其實「放生」。至於喺香港放生嘅生魚同巴西龜，十居其九唔係野生捕獲，而係透過商販購入，話就話買「刀下魚」放生功德更大，其實講到尾又係錢作怪，喺需求帶動市場嘅定律下，等於變相鼓勵捕殺動物。
有辦你睇，廣西玉林狗肉節惡名昭彰，丟架丟到國際，唔少有心人專程上去拯救毛孩，不惜花費重金向肉販子買狗，對方見有利可圖，唔單止捉得更加有恃無恐，部分甚至皇帝女唔憂嫁，吊起嚟賣，結果反而害咗班毛孩。
冇錯，「上天有好生之德」，挽救動物積陰德，信念不可謂不崇高，但其實愛護動物仲有好多實際嘢可以做，幫志願團體做義工又得，食齋唔食肉亦得；至於講到以生命延續生命咯喎，就梗係莫過於簽番張器官捐贈卡，救人一命勝造七級浮屠，世間最大嘅功德莫過於此！