政情：陳肇始同葉沛霖「識於微時」
政府近年強調要做好地區醫療工作，減輕公共醫院嘅負擔，一班公立醫院醫生就自發成立非牟利「全民健康協會」，尋日舉行協會辦事處開幕儀式時，食物及衞生局局長陳肇始都去撐場。陳肇始自爆喺大學教書嗰陣，曾經教過協會主席葉沛霖，仲笑言兩人算係「識於微時，但係佢（葉沛霖）嘅微時」喎。
葉沛霖讚陳係好老師
陳肇始話，佢喺香港大學任教時有好多學生，但葉沛霖係好特別嘅一位，形容佢細個嗰陣已經對公共衞生課題好有興趣，當時好少學生有心修讀碩士課程，所以特別記得葉沛霖。葉沛霖就讚陳肇始為人親切，對學術議題有問必答，亦不時現身支持佢喺醫院同埋社會服務團體嘅工作，絕對係一位好老師。
而仲未有政治助理呢個問題，陳肇始話立法會喺十月復會，希望政助盡快埋班。現時同立法會嘅溝通工作係由副局長、公務員同事及自己分擔，佢冇提及政助任命係咪有阻礙，只係話現時工作無問題。