政情：林卓廷「機器壞」 白鴿鬥輸民協
打籃球有身高優勢可謂事半功倍，但係體能亦同樣重要。民主黨（白鴿黨）同民協尋日打咗一場籃球友誼賽，身高一米九二嘅白鴿黨立法會議員林卓廷本應係關鍵球員，但年僅四十歲嘅佢比賽無耐就因腰傷退出，要由大佢十幾歲嘅黨主席胡志偉撐場，結果輸波，林卓廷仲自嘲「年紀大，機器壞」喎。
籃球賽腰痛變做觀眾
呢場友誼賽喺黃大仙摩士公園體育館舉行，身兼黃大仙區議員嘅胡志偉佔主場之利，反觀老巢喺深水埗區嘅民協，以及助陣嘅公民黨油尖旺區議員余德寶就猶如作客。身高冠絕全場嘅林卓廷話，自己主打搶籃板，成功搶到幾個進攻籃板得分，但比賽無耐就腰痛發作，需要離場休息，「做觀眾多過落場」。
結果白鴿黨要靠年屆五十四歲嘅胡志偉撐場，林卓廷話胡志偉早年喺美國讀書時，練得紮實嘅籃球技巧，形容胡嘅打法係體力消耗型。比賽進行咗兩個鐘，雖然球賽冇設球證同分牌，亦冇計分，但白鴿黨就承認對手得分較多，即係輸咗。
早前民協爆退黨潮，白鴿黨出手撬人，似有吞併民協之勢，唔知兩黨係咪趁友誼賽商討日後合作？林卓廷話「你估籃球外交咩？」強調比賽只係為咗出一身汗，外界唔需要太多解讀喎。