政情：報名渡海泳 羅致光水試甩底
維港渡海泳復辦後，每年吸引唔少政界人士參與，熱愛游水嘅勞工及福利局局長羅致光（CK）都報咗名，原本尋日要參加水試，不過最後甩底無現身。CK事後解釋話，只係改咗水試日子，之後會進行補考，又透露自己大學時代每次落水，閒閒哋都游四千米，仲要每星期游四次，對於四十五分鐘之內游畢千五米嘅水試要求，CK豪言「應該無問題」。
想體驗維港水質
將於十月舉行嘅渡海泳，近日進行水試，其中悠閒組尋日舉行嘅水試名單中，出現咗羅致光個名。眾所周知CK鍾意游水，放假經常會去泳池。CK尋日回覆本報查詢時，大方承認報咗名參加渡海泳，指渡海路線由尖沙咀公眾碼頭至灣仔金紫荊廣場碼頭，可以順便體驗維港水質有冇改善到喎。
唔少立法會議員都係渡海泳常客，例如有「立法會飛魚」外號嘅紡織及製衣界鍾國斌、會計界梁繼昌同體育界馬逢國都經常參加；問責官員方面，兩年前任政制及內地事務局副局長陳岳鵬同商務及經濟發展局副局長梁敬國都曾經參加過，羅致光如果通過水試，就會成為第一個挑戰渡海泳嘅局長級官員喇！