政情：英美傳媒盲撐雙學三子 譚允芝大反擊

早前區域法院裁定七名警員喺佔領期間襲擊前公民黨成員曾健超罪成，判各人入獄兩年，唔少親建制人士都質疑判刑過重，部分人更針對主審外籍法官作出人身攻擊，當時多名反對派人士都直斥有關言論，認為有藐視法庭之嫌。但去到雙學三子被判監，同一批反對派人士、當中包括多名律師同大律師，就掉番轉頭質疑甚至攻擊有關華裔法官，完全唔記得自己以前講過啲乜。其後大律師公會同律師會罕有發表聯合聲明，強調冇證據顯示上訴庭判決涉及政治考慮，本港班反對派同英美傳媒都當睇唔到，令人覺得雙學三子等反中亂港人士擁有「外國超級保護傘」。

質疑「九成九九」冇研究上訴庭判詞

譚允芝喺節目中指出，關於「外國法官就會咁樣裁決」嘅言論，並非國際社會會認同嘅睇法，但今次卻連美國《華爾街日報》、《紐約時報》、以及英國《衞報》都咁講，好明顯呢啲傳媒「九成九九」都冇研究過上訴庭嘅判詞，亦冇切實理解過香港嘅司法體制係點樣，喺咁嘅情況下，本港法律界有必要好大反應咁反擊。

人大有權解釋《基本法》 唔係施壓

對於回歸後內地同香港出現「三權合作論」、法官被要求「愛國愛港」等，譚允芝認為值得關注，但事實上喺過去廿年來，都睇唔到中央有向本港法官施壓。

譚允芝又話，人大釋法其實唔可以話係施壓，因為全國人大常委會的確有權去解釋《基本法》條文，但當然亦唔應該經常釋法，因為法治概念嘅其中一個重要元素，就係法律條文要有可預測性，通過普通法嘅法庭案例去演繹，大家亦有迹可尋，而唔係忽然跳咗去由立法機關去解釋；若果法庭最後發現現有法例未能覆蓋社會嘅最新情況，就應該交由立法會去修改法例。