中環出更：林芷筠或出戰立會建築界補選
終審法院日前拒絕青年新政游蕙禎同梁頌恆就議員宣誓案提出終極上訴，至於梁國雄、劉小麗等四名前民主派議員嘅宣誓案，上訴限期將於本月十一日屆滿。政制及內地事務局局長聶德權尋日表示，等有關上訴限期屆滿後，前後六個立法會議席嘅補選日期先至會明朗化。雖然補選日子仍然未定到，但各方有志參選人士早已做緊部署。當中唯一一個功能界別建築、測量、都市規劃及園境界（建築界）嘅空缺，有傳民主派會改派年輕女性城市規劃師林芷筠（Camille）出戰，接替有意轉戰地區直選嘅原議員姚松炎。
接替姚松炎 迎戰謝偉銓
林芷筠係「本土研究社」成員，但政治立場唔算本土派，而係同姚松炎差不多，介乎傳統泛民與自決派之間，加上佢又年輕，吸票能力隨時仲勁過姚松炎。喺舊年嘅特首選舉委員會建築界分組選舉，Camille就以超過二千二百票高票當選，令唔少資深業內人士大跌眼鏡。Camille接受本報查詢時表示，得悉有人推薦佢出選，但強調業界內同姚松炎相熟嘅團體仍就人選商討緊，現階段不作評論。
之不過，建築界立法會選舉向來係建制派佔優，舊年換屆選舉姚松炎能夠爆冷勝出，主因係建制派同時有角逐連任嘅謝偉銓（Tony）與建築師學會前會長林雲峯參選分票。吸取上次教訓，建制派今次已協調好由Tony一人出選，即使民主派換上新面孔出戰，亦未必可以再創奇迹。謝偉銓尋日就重申，自己早已表明「積極考慮參選」，希望當局盡快安排補選，以免建築界長期冇咗個代表喺立法會發聲。睇嚟佢真係好心急囉！
卓妮