中環出更：余偉傑搞創新 國貨唔老餅
羨慕外國月亮特別圓又或者隔籬飯香？其實香港都有唔少質素高嘅本地薑陪伴港人一齊成長，不過亦有唔少老字號已經銷聲匿迹，究竟傳統老牌點先可以成功轉型？早前卓妮喺首屆「香港地品牌大獎」頒獎典禮上見到國貨公司第三代余偉傑（Andrew），佢返咗公司幫手幾年，將品牌重塑兼年輕化，搞得有聲有色，不過就唔敢將舊嘢淘汰晒。
Andrew話，見過有後生仔去國貨公司指定要搵舊茶葉，舊包裝嗰種，所以佢搞革新特別小心，唔輕易放棄傳統，因為舊嘢始終有一班忠實擁躉。Andrew近期仲密鑼緊鼓籌備開辦品牌新副線，希望吸納年輕顧客，仲話年輕化係吸引新一代接觸傳統嘅入口同途徑。
謝嘉恩着旗袍撐本地文化
活動籌委會主席謝嘉恩、設計師余嫿及香港人撐香港品牌主席胡建東都有出席。謝嘉恩穿上本地設計師嘅新式旗袍現身，力撐本地文化。講起消失咗嘅品牌，係唔少人嘅集體回憶，胡建東就對大大百貨公司、妙麗手袋及BANG BANG牛仔褲印象特別深刻，可惜呢啲品牌都已經執咗笠。佢話紅極一時嘅品牌無法延續嘅原因好複雜，管理不善可能係其中之一。佢認為做產品嘅行業比服務業相對容易維持質素，服務業就好靠口碑喎。
同場仲有傳統工藝工作室創辦人之一黃詠萱，佢哋將傳統大型港式花牌製成迷你版，變成新式送禮佳品。呢日佢就帶咗一個人手製嘅小型花牌到場，非常有心思。
卓妮