政情：眾志「紅」着眼 咬住蔡若蓮唔放
教育局副局長蔡若蓮未上任已畀人質疑會「染紅」學界，包括強推國民教育，雖然教育局已作出澄清，其實學校一直有推行國民教育，但由黃之鋒任秘書長嘅香港眾志似乎唔收貨，繼續咬住教聯會出身嘅蔡若蓮唔放，眾志常委鄭家朗更聲言，自從蔡若蓮任副局後，早前被押後嘅初中中國歷史科課程修訂，計劃喺十月再作諮詢，擔心「染紅」教材會陸續有來。
其實蔡若蓮上任副局後快將「滿月」，對外發言主要係同屯門興德學校被揭涉以「影子學生」呃津貼嘅醜聞有關，不過，部分人對佢會「染紅」教材嘅質疑已經係入晒腦。
促教局修改通識科教材
眾志鄭家朗及黃莉莉尋日以眾志名義舉行記者會，分析當局今年更新嘅「通識科課程資源冊系列─今日香港」教材，質疑有關教材內容「染紅」偏頗，要求當局應重新審視所有教材，修改或撤回有意識灌輸嘅偏頗教材，又期望可以撰寫民間版教材，甚有同官方抗衡到底嘅味道。