政情：吳永嘉晒出席率建制議員添壓力

吳永嘉最新工作報告合共有八頁，最後一頁係關於參與立法會事務概況，圖文並茂羅列自己喺剛過去嘅立法年度，參加包括大會、內務委員會、工商事務委員會等十個會議嘅出席率，全數出席率均有八成以上，當中有六個嘅出席率為九成或以上，一般相信，吳永嘉嘅出席率都見得人，先會咁大方對外開誠布公。

劉業強鍾國斌相形見絀

不過，吳永嘉呢個自揭出席率嘅做法，有人認為可能有變相向其他建制派施壓嘅味道，事關部分建制派功能界別議員，好似鄉議局代表劉業強、紡織及製衣界議員鍾國斌等，大會出席率係八成半或以上，原本呢個出席率都唔算低，之不過一山還有一山高，剛過去嘅立法年度，有多於一半議員出席率達到百分百，相比之下，佢哋嘅大會出席率就有啲落後。

另一方面，佢哋兩人喺多個事務委員會嘅出席率都慘不忍睹。例如政制事務委員會上，鍾國斌嘅出席率只得四成二，不過劉業強仲差，只有一成七。

被問及自揭出席率嘅做法，會否對其他建制派議員有無形壓力，吳永嘉回應指唔會有壓力嘅，因為一來好多議員同事都好勤力，二來今次做法只係報告番畀選民同朋友知道。

其實就算議員唔想自揭出席率，最終亦會無所遁形，事關雖然之前有建制派功能界別議員，對立法會秘書處推出「議員參與立法會事務紀錄系統」，詳細記錄議員喺立法會會議嘅出席情況有保留，但最新消息指，有關系統已靜悄悄運作中，因此，就算議員唔自爆，公眾都有辦法知得一清二楚。

講到尾，議員開會係應有之義，邊個人係「大懶蛇」或開會時純粹「打卡」，外界都心中有數，因此一眾議員都係好自為之，否則下次選舉選民手中一票發揮威力時，就追悔莫及嘞！