有網民打個譬喻，「帕卡」同「天鴿」兩公婆前幾日嗌交，老婆「天鴿」離家出走，老公「帕卡」沿路遍尋不獲，大發脾氣四圍搞破壞。講笑還講笑，但香港短短幾日連續兩次掛八號波，又真係幾十年唔逢一閏，喺度真係要為嗰班盡忠職守嘅救援人員點個讚！
救援人員勞苦功高，自不待言，之但係以身犯險有時都要睇吓值唔值得，好似有啲人明知打風危險，仲不自量力進行高危活動，你話呢啲人抵唔抵幫？呢嗱，話口未完又有新鮮滾熱辣例子。話說一對男女前晚七點幾行黃大仙飛鵝山，冇耐之後被困，女嘅仲墮下百米山谷，要急Call消防，結果足足擾攘近廿四小時先至脫險。由於山勢險要，加上天氣惡劣，整個拯救過程險象環生，有消防員受傷送院治理，好在只係手腳擦傷吓，冇乜大礙咋。
可惜唔係次次都咁好彩。之前有對情侶行山，冒住濃霧挑戰四星級難度嘅馬鞍山郊野公園，結果喺吊手岩蕩失路，被困遠離行山地點嘅密林當中，一名消防總隊目救人途中不慎失足墮谷殉職，遺下孤兒寡婦。啲人不顧安全不計後果，為咗一時之快拆散人哋大好家庭，試問成世點過意得去？
喂，大家都係成年人 ，冇理由連少少風險意識都冇啩。大家應該記得，舊年寒流襲港，好多市民專程上大帽山頂賞霜兼打卡，其中有位奇女子霸氣過人，嘗試越過警方封鎖線被阻，居然大大聲鬧番轉頭，話「命係我自己嘅」，當時好多人都好想睇吓萬一呢名奇女子「求仁得仁」，係咪真係「自己的命自己救」。今次打風行山出事嘅主角態度好少少，為麻煩救援人員而耍晒冧，但一句唔好意思唔係大晒，自己玩命搞到其他人，點都講唔過去。
當然喇，基於人道立場，即使係現行械劫犯都冇可能見死不救，但最少都要令到不負責任嘅人付出相應成本。幾年前台灣一位大學生颱風天到海邊衝浪，罔顧現場人員阻止，結果被罰款二十五萬新台幣。近年部分地方政府更計劃針對登山活動訂立專門條例，違規者除咗罰錢，一旦發生事故仲要支付全額搜救費用。前排有位台灣登山男失聯三十多日被尋回，有人計過數，相關救援成本超過一百五十萬新台幣，收回成本價，起碼可以等班友進行高危活動前停一停，諗一諗。
他山之石，可以攻玉，收回救援成本呢一招，值得港府借鏡。反正港產官僚最興搞「用者自付」以防「濫用」，公立醫院急症室收費大幅加價，尚且手起刀落，家陣班打風落雨行山衝浪嘅妄人，擺明濫用公共服務，更加唔使手軟喇下話？