政情：楊哲安重新落區 為補選鋪路？
獲政府委任為財經事務及庫務局局長嘅陳浩濂，早前已經辭任中西區山頂區議員，政圈盛傳教育局局長前政治助理楊哲安好可能代表自由黨參與該區補選。離開官場後加入獵頭公司嘅楊哲安尋晚喺Facebook上更新自己嘅工作履歷，紀錄顯示佢今個月開始喺自由黨返工，令人聯想佢或者會出戰山頂區補選，為該黨取回該區議席。
空穴來風，未必無因！事關楊哲安喺早兩日打風之際，已經喺Fb上載咗幾張山頂區視察樹木倒塌嘅相片，似係食回頭草，重新開展地區工作。早前亦有自由黨中人透露，黨內可能會推舉佢出選山頂補選，只等待高層開會敲定最終人選。之不過，坊間盛傳兩年前曾喺山頂選區挑戰陳浩濂嘅「2047香港監察」成員陳樹滿亦都有意參與補選，所以倘若楊哲安真係披掛上陣，亦未必可以無風無浪。