政情：黃浩銘坐監練大隻 「四大水樽」舉重
立法會財務委員會喺一四年六月審議新界東北發展計劃，有示威者衝擊立法會大樓，事後十三人被裁定非法集結罪成，早前更因律政司提出覆核刑期得直而改判囚，當中包括社民連副主席黃浩銘。黃浩銘依家喺赤柱監獄服刑，佢胞妹前日探監後，晚上喺黃浩銘嘅Facebook專頁發文透露獄中生活，指佢喺獄中識咗個健身教練，仲用大水樽舉重同埋跑步嚟鍛煉自己身體。
胞妹期待佢練成八舊腹肌
根據文中內容，黃浩銘喺獄中用嚟舉重嘅器具，係以四個大水樽製作而成。此外，佢亦會喺操場跑三十個圈嚟強健體魄。佢胞妹又話期待佢嘅八舊腹肌，仲叫佢唔好走數。
黃浩銘現時喺獄中嘅縫紉組返工，但因為係「新手」，所以現時嘅工作只有掃地、洗廁所，稍後先能夠正式縫製衣服。由於佢係新人，因此被安排兩個人一間房，房間內有廁所，但整體較狹小，而且冇風扇，比較悶熱。
佢胞妹亦透露，黃浩銘「無時無刻也想出來見大家，與大家一起戰鬥」，又指獄中嘅懲教人員、其他囚犯、福利官都對佢好。佢又希望公眾可以寫信畀黃浩銘，又指佢現時只收過一封信。