政情：學聯家嘈屋閉 老鬼冇眼睇
曾經係社運中堅嘅香港專上學生聯會（學聯），喺三年前嘅佔領行動後開始碎片化，退聯潮更被揭學聯財政唔透明等問題。其中年花學聯近六萬元、畀十幾個社運人士佔用，但唔屬於學聯監管嘅「學聯社會運動資源中心」（自治八樓）就最為人詬病。學聯上個月決定收回「自治八樓」，要求八樓使用者下月底前遷出；自治八樓早前就開咗Facebook專頁，大鬧學聯係「粗暴」收回，澄清十幾個外界對於八樓嘅誤會，其實都係唔想交還八樓。
「收樓」決定惹社運人士不滿
位於旺角金輪大廈八樓嘅「學聯社會運動資源中心」喺九十年代成立，當時中心仍然喺學聯架構之下；直到大約十年前，有使用者因不滿學聯打算改變資源中心用途，自行宣布脫離學聯規管，改名做「自治八樓」。直至三年前學聯爆發退聯潮，有人統計學聯資產嘅時候就發現，學聯一直負責支付「自治八樓」嘅水費、電費、清潔費、差餉等，但係學聯竟然無物業嘅管理權，爆出極大爭議。當時就有聲音話要收回「自治八樓」，至少可以租出去為學聯增加收入，應付日後社運開支，都比目前任由其他人「佔領」好。
三年過去，學聯今屆代表會終於決定要收回「自治八樓」，仲去信要求依家嘅使用者喺下個月底前遷出，據知八樓使用者唔肯。有「自治八樓」嘅使用者早前就開咗Facebook專頁「共治八樓」，澄清十幾個外界對於八樓嘅誤會，解釋成員係參與保衞天星皇后碼頭、反高鐵護菜園及支援重建區抗爭嘅社運人士，佢哋又強調任何人都可以加入成為八樓成員，更譴責學聯收回八樓嘅決定，話會抗爭到底，直至同學聯達成共識。
喺八九年及九○年先後出任學聯秘書長嘅陶君行同蔡耀昌等人，曾經去北京協助內地民運人士，呢個可謂係學聯嘅火紅年代，但喺佔領行動後出現退聯潮，依家又發生內亂，甚至同社運人士起爭拗，唔知呢班學聯老鬼見到依家嘅學聯會有乜感受呢？