中環出更：張建宗 陳茂波硬銷高鐵好方便
廣深港高鐵香港段一地兩檢方案出籠後，惹起好大爭議，民主派不停批評係賣港割地，仲揚言會用盡一切方法反對添！唔知係咪要抗衡呢種諗法，班高官亦都打民意戰，好似政務司司長張建宗同財政司司長陳茂波（波叔）早前返內地交流，都要硬銷高鐵幾咁方便，效果係點？見仁見智喇！
訪內地返港後寫網誌大讚
兩位司長喺訪內地返港後，一如以往寫咗長篇大論嘅網誌同公眾分享佢哋嘅旅程。波叔就提到自己今次去咗武漢、長沙同埋鄭州，去當地嘅企業參觀。當中佢就透露，喺武漢搭高鐵去長沙，之後再轉去鄭州。喺網誌上，佢除咗喺武漢站外嘅「到此一遊」相片，仲大讚高鐵之旅快捷舒適。而且佢仲「推銷員」上身，話將來喺香港搭高鐵，三個鐘就去到長沙、四個半鐘就去到武漢、六個幾鐘仲去埋鄭州添！
另一邊廂，張建宗就去咗廣州，同廣東省市領導會面，仲去埋高科技公司參觀。佢喺網誌透露，本身會去埋南沙，點知因為快速渡輪機件故障，搞到佢去唔成，話自己一定會再去，佢仲話經過今次去唔成南沙，令佢更加期待出年高鐵通車，咁佢就可以喺香港搭高鐵直通南沙嘞！
卓妮