中環出更：陳恒鑌耳膜穿窿唔使醫
運動有益身心，但做運動唔小心就好容易受傷。立法會議員陳恒鑌（Ben）出席一個長者活動時自爆，喺舊年年中踢波嘅時候，唔小心整親隻耳仔，仲搞到耳膜穿咗個窿添！至於油尖旺區議員陳少棠亦自爆打網球成日整親，係「容易受傷的男人」喎。
阿Ben話喺舊年立法會選舉前有一場球賽，佢隻耳仔唔小心整親，睇醫生先發現耳膜穿咗個窿，仲出現耳鳴等情況，好彩個窿唔大，亦都唔使特別做咩治療，等個窿自己慢慢好番，但就唔可以入水，洗頭要小心，亦唔可以去游水，結果等咗成四個幾月先好番，聽落真係令人擔心。
關浩洋踢波整爛假草地
原來陳少棠同出身網球世家嘅林曦明係由細識到大，亦都由細一齊打網球打到大，佢話打咗網球都差唔多有四十年，試過扭傷腳，亦試過打得太耐，右後背整傷，足足九個月先至好得番。成日都整親，唔知太太有冇話吓佢呢？佢就話冇，仲話家人都習慣晒啦，又話自己係「容易受傷的男人」。
九龍城區議員關浩洋同勞工及福利局副局長徐英偉（Caspar）亦有現身，佢哋仲有份落場同小朋友及一班祖父母踢下波，關浩洋相當落力，仲唔小心踢爛咗用布整出嚟嘅假草地添！
Caspar講起踢波就話以前踢波唔叻、跑步又唔夠氣，所以惟有做守龍門，連守龍門都成日食波餅添！之前佢講過話因為小朋友學美式欖球，佢特登學咗，可以去教人o架，但自從轉咗去勞福局後仲未有時間教住，因為實在多嘢做，話「勞福局」係「勞碌局」。
卓妮