古人話︰「生於憂患，死於安樂。」強颱風「天鴿」早幾日吹襲香港，託賴冇造成太大破壞，但係就搞到澳門雞毛鴨血，死傷枕藉，不過香港人千祈咪沾沾自喜，特別係港產官僚，家陣最緊要係打醒十二分精神，咪瞌眼瞓吖！
大家有眼睇，今次澳門嘅重災區集中喺舊區一帶，部分地方停電停水足足幾日，街上垃圾堆積傳出惡臭，凸顯嘅城市基本建設落後、當局應變能力不足等問題，好值得港產官僚引以為戒。冇錯，本港供水供電系統一向算係穩定可靠，但唔怕一萬，最怕萬一，平時加強檢查點都好過出咗事亡羊補牢；仲有就係本港舊區地下水管、電線同煤氣等管道出咗名錯綜複雜，殘殘舊舊，颶風來襲分分鐘成為計時炸彈，不可不防。
今次澳門風災其中一樣最得人驚嘅係，原來好多建築物都「弱不禁風」，有豪宅成幢玻璃全部爛晒，嚇到居民夜晚唔敢靠近窗口瞓覺，有人甚至疊埋心水搬屋。嗱，咪以為呢類豆腐渣工程係澳門「特產」，其實香港部分地區基建都係一擔擔。好似耗資二億元嘅將軍澳南海濱長廊咁，一場風暴過後滿目瘡痍，本報記者實地視察，發現單車徑隧道慘變「河道」、長廊行人路圍欄及石躉好似骨牌咁倒冧，咁都未算最離譜，有供電箱成個被吹冧，裏面嘅電線外露，真係睇見都牙煙。
唔講唔知，原來將軍澳南海濱長廊啟用只有短短四年貨仔，但颱風後亂象四起已經唔係第一次，一四年「海鷗」來襲就吹到冚包散咁滯，當時港府部門實牙實齒話會跟進，點知話口未完又重蹈覆轍，你話班官係咪食塞米o架！
一滴水睇穿整個世界，好似海濱長廊咁簡單嘅地區工程都咁多問題，其他大型基建萬一有乜冬瓜豆腐，後果真係不堪設想。唔係危言聳聽o架，淨係港珠澳大橋香港段工程，一時又話冧堤，一時又話飄移，鑊鑊新鮮鑊鑊甘，頂唔頂得住大風大雨，真係冇人話得埋。
講番今次「天鴿」風災，唔理澳門當局應變善後點差都好，有樣嘢始終值得香港學習，當地氣象局局長因為警示不足引咎辭職，反觀香港無論爆幾大鑊都好，官老爺笑罵由他笑罵，好官我自為之，幾乎從來冇人要問責。特別係天文台，十次測風八次錯，今次冇失準只係好彩。天文台公信力零蛋，如果唔係就唔會有「力場」呢個都市傳說喇。
始終都係呢句︰居安思危，思則有備，有備無患。風季當前，唔該官老爺提早堵塞漏洞，做好預防措施，否則大吉利是搞出人命，你哋人頭落地都補唔番吖！