政情：高官揭秘 鬍鬚曾守財 撤對沖受阻
新任行政會議成員、金管局前總裁任志剛日前撰文，不點名批評前財政司司長曾俊華（鬍鬚曾）為「守財奴」，掌管港府財政近十年間只識儲錢，唔識使錢，令民怨不斷加深。有港府高層近日再踢爆，取消強積金對沖嘅方案遲咗出台，原因之一正係鬍鬚曾從中作梗，拒絕運用公帑補貼僱主因取消對沖而承擔嘅額外開支。如果唔係鬍鬚曾其後為咗參選特首而辭職，取消對沖方案隨時等到上屆政府落台都無法推出，令整個諮詢及立法程序進一步推遲，更多打工仔嘅強積金被沖走。
上屆政府上台前承諾會逐步取消強積金對沖機制，但要全港打工仔等足四年半，到今年一月公布嘅任期最後一份施政報告，先至正式公布具體嘅取消對沖方案。連同諮詢同談判程序，最終去到今年六月底、即上屆政府臨落台前一個星期，行會先至就方案拍板，畀人拖到最後一刻先做嘢、將落實方案責任推畀新一屆政府嘅感覺。
拒補貼僱主勞福開支
不過，最近有港府高層爆料指，其實上屆政府早於約一年前、即去年八至九月時，已敲定現有嘅取消對沖方案，認為只有由政府出資補貼僱主部分開支，方案先會有機會同時獲得勞資雙方支持。然而港府內部負責「睇數」嘅官員，一直堅持唔應該動用一分一毫公帑嚟補貼僱主嘅勞工福利開支，令方案遲遲出唔到街。
直至去年十二月，呢個僵局先至取得突破，港府內部終於同意斥資約六十億元，補貼僱主喺取消對沖後首十年嘅部分開支。到六月行會正式討論時，補貼金額更加增至七十九億元，嚟緊可能仲會加碼。
辭職後 行會即討論方案
去年十二月港府發生咗咩重大變動？咪就係鬍鬚曾辭職參選特首囉！翻查資料，鬍鬚曾喺去年十二月十二日辭職，行會喺大約兩個星期後，就首次討論以補貼形式落實取消對沖嘅方案，時間上好脗合。
再睇番鬍鬚曾參選期間嘅言論，佢最初對應否取消對沖一直支吾以對，強調唔係政府想點就點，要勞資雙方努力。畀勞工界同社福界逼多兩逼之後，佢先改口建議由政府成立種子基金，再由資方額外供款應付取消對沖後嘅開支，同直接由公帑補貼仍相差好遠。如果當時係鬍鬚曾當選特首，可能現有嘅取消對沖方案經已被推翻，打工仔又要等多五年先望得見曙光。
咁啱尋日鬍鬚曾出席一個功夫文化研討會，被問到對於任志剛言論有咩睇法時，佢只係話：「我哋今日講功夫，唔講其他嘢。」