中環出更：游蕙禎認驕奢躁進 種因嘗果
青年新政游蕙禎同梁頌恆就立法會議員資格司法覆核案終極上訴失敗，游蕙禎尋日喺社交網站Facebook撰文認衰，承認自己「驕奢躁進」，自己種因就要嘗果，又為失去議席向議員助理同支持者道歉。
游蕙禎以「陳情表」為題抒發喪失議員資格嘅感想，多處流露後悔之情，稱為自己「昨日的驕奢躁進」汗顏，又話「自己種下的因，結的果要由自己品嘗」；文內亦寫到「之後所作的動作，也無助修正當時的失誤」，文筆中透露佢恨錯難返。不過，當日宣誓風波係事件嘅起因，游蕙禎始終唔願提呢兩個字，亦未有交代宣誓相關嘅事。
向議員助理選民道歉
游蕙禎又對自己失去議席，令一班議助「無得撈」感到萬分愧疚，亦向投佢一票嘅選民道歉。佢喺文章最後指兩年前自己孑然一身，感悟唔應抱持「以議席為先」嘅思維，話日後會以唔同角色同崗位拾道而行。不過網民似乎對游蕙禎的感想唔多受落，批評佢因宣誓失敗而喪失議員資格係幼稚行為，有人就叫佢「找咗條數先」，亦有人標籤「回咗水先啦」，提醒佢盡快向立法會交還欠款。
卓妮