中環出更：一帶一路做生意 李柏成教路保平安
潮流興去一帶一路沿線國家做生意，不過好多國家政局不穩，隨時商機變危機。早幾日博愛醫院舉行「博愛月全港慈善籌款」開幕禮，好耐冇見嘅博愛副主席李柏成（Jim）都有到場，Jim笑言近排經常去一帶一路國家穿梭做生意，有好多新奇經歷。佢就啱啱喺巴基斯坦返嚟，遇上當地總理因貪污下台，期間拜會軍方高層時，沿途仲有好多持長槍護衞，都咪話唔危險。
不過Jim就好輕鬆話，佢同新上任嘅總理更加熟，事關對方原本係石油部長。講就咁講，Jim都話出入呢啲風險較高嘅國家，人身安全最重要，建議港商最好同當地人合作，由落機嗰一刻開始，就有當地人接待及安排所有活動。佢自己就係拍住中國內地政府一齊做生意，見親一帶一路國家嘅人層次好高，唔係部長、議長就係總統，難怪佢話好過癮。
講番晚宴有好多地區人士現身支持，包括北區區議會主席蘇西智及葵青區議會主席羅競成等人，博愛主席彭少衍及博愛月籌委會主席陳首銘都忙於招呼賓客。彭少衍話，博愛月係該院重點籌款活動，包括慈善義賣及勸銷十元慈善獎券等，希望全城支持令善款再創高峰。
蘇西智關注北區住屋問題
蘇西智講起未來幾年北區嘅任務繁重，話無論係生人或死人嘅「住屋」問題都睇北區喎。原來佢講緊該區未來將有廿萬個公營骨灰龕供應，又興建緊大型屋邨，預計區內人口將增加廿五至三十萬人，比現時三十一萬人口勁增近倍，到時區內工作就更加繁重喇！
卓妮