政情：「天鴿」襲港 拆麥美娟地辦招牌
「天鴿」襲港，殺傷力好大，到處塌樹、水浸，而立法會議員麥美娟（Alice）嘅地區辦事處都遭殃。話說前日喺強風底下，Alice喺青衣嘅地區辦事處招牌都吹爛埋，要進行「急救」。
物色實淨物料取代膠片
Alice話呢個辦事處近青衣碼頭，好食風，由於個招牌係膠片，以前打風都試過整爛，今次天鴿風勢咁勁就更加頂唔住喇！佢話喺發現咗辦事處嘅招牌爛咗，由於仲係掛緊十號風球，當時戶外實在太危險，所以等颱風遠離，風勢冇咁勁嘅時候，就搵埋工作團隊一齊去辦事處，緊急處理爛咗嘅招牌，仲夾手夾腳執番好啲嘢添！
由於膠片招牌容易爛，Alice話怕爛咗之後會整親人，所以會搵其他實淨啲嘅物料整招牌，都唔知幾時先可以裝番個招牌上去喎。