政情：同建制派好熟？陳積志唔認係「紅」底
政府日前公布第二輪政策局副局長同政治助理名單，民政事務局局長劉江華尋日聯同新任嘅副局長陳積志同政助黎穎瑜一齊出嚟見傳媒。陳積志過去被指與地區建制派較為熟落，甚至曾被稱為「紅」底，佢回應時否認自己係「紅」底，指自己過往工作係要與各界人士接觸，又話「所有人都係我朋友」、「所有人我都接觸」。
鑑於劉江華係民建聯成員，當問到陳積志入咗民政局後會唔會令人擔心該局「好建制派」，陳積志就話唔擔心，又指自己唔會只接觸一方面，而劉江華亦話政府嘅角色係同社會各界保持聯繫，希望多接觸唔同黨派，唔存在優待某一派別。
黎穎瑜人脈廣有助工作
陳積志強調自己擔任公務員已達三十四年，曾出任十七個唔同職位，指自己現時以另一身份服務市民，未來會「多聽、多學、多做」，為市民服務。黎穎瑜就話自己喺本月初已上任，其主要工作為推進青年同文化。
劉江華又話陳積志喺民政事務總署工作六年，再加上佢喺政府中長期服務，雙方一直有緊密合作，認為佢可以幫到各方面嘅工作，佢又指黎穎瑜過去曾喺勞工及福利事務局工作，而且有唔少人脈網絡，能夠有利局方日後嘅工作，希望將來能順暢推進工作咁話。