政情：師徒制落後 吳宏斌倡辦珠寶學院
港人對珠寶首飾嘅審美要求甚高，但喺香港除咗一啲短暫嘅證書課程同私人機構外，一直未有一間相對正統或認受性較高嘅珠寶學院。從事珠寶行業多年嘅中華廠商聯合會副會長吳宏斌話，希望香港設立珠寶學院，除咗可提高專業地位之餘，亦為年輕人提供多一個機會，入唔到大學都可以選擇一個自己喜歡嘅專業。
吳宏斌話澳洲同加拿大等地都有珠寶專業大學或學院，然而香港珠寶界新一代現時好多都仲係依賴企業內部培訓同師徒制，其餘市場上大多係私人機構辦嘅單項目課程，並唔係全科，若要喺珠寶界工作，需要了解嘅專業知識仲有好多，因此唔少有意發展嘅人都選擇喺外地進修。
咁有乜構思呢？佢認為相比外國單純銷售為主嘅地方，香港更有利於學習同吸收業內實用知識，他舉例指香港設立珠寶學院一個四年制嘅課程，當中可包括對珠寶生產認識、物料應用、設計概念、軟件使用以至了解市場同客戶需求等，就可以更全面同專業。唔知佢呢個夢想幾時可以實現呢？