政情：任國棟帶兵過檔 白鴿黨圖吞併民協？

據了解，白鴿黨本月初已邀得民協前副主席、紅磡前區議員任國棟、馬坑涌區議員黎廣偉加入該黨，彌補九龍西地區樁腳嘅不足。上屆區議會選舉任國棟因失落議席而退黨，估唔到佢沉寂兩年，竟然加入白鴿黨做紅磡社區主任，更身兼立法會議員黃碧雲（一舊雲）喺九西辦事處嘅義務顧問。消息指出，任國棟唔止個人加入白鴿黨，更邀得一班民協前職員過檔，但亦有人話，失去立法會議席嘅民協無足夠資源「養咁多人」，職員都係無奈跳槽。

傳莫嘉嫻獲邀入黨

任國棟接受查詢時承認出任白鴿黨職員，至於入黨一事就要考慮，佢又話重返紅磡開街站嘅時候，街坊反應熱烈，希望可以繼續服務。至於「老家」民協，任國棟就拒絕評論。除咗已經曝光嘅人，外界亦盛傳民協前主席莫嘉嫻獲邀加入白鴿黨。莫嘉嫻接受查詢時就話，自己仍未交表申請入黨，目前仍在考慮中，之後會再交代。

一舊雲就否認「吞併」民協或者撬人，佢話政黨成員有加有減好平常，白鴿黨亦不時有人退出，佢重申歡迎有共同理念嘅人加入，為民主努力。至於日後會唔會再向民協撬人，佢就話若果有申請就會啟動程序處理。

雖然白鴿黨否認撬人，但事實上佢哋同民協的確係一個此消彼長嘅情況，白鴿黨要接收民協舊黨員，相信要諗個方式先可以避免遭人口實喇！