中環出更：黃之鋒繪監房平面圖錯字百出

【本報訊】「雙學三子」黃之鋒、羅冠聰及周永康因衝擊政府總部東翼前地，被判即時入獄六至八個月。黃之鋒嘅Facebook專頁尋日就貼出由黃之鋒寄出嘅書信，內附由黃親繪在囚嘅壁屋懲教所監房平面圖，顯示牢房共住兩個人，有廁所、硬板床、洗手盆、儲物箱等設備，仲披露咗佢喺牢籠裏嘅日與夜。

不過，黃之鋒繪畫嘅監房平面圖錯字多多，黃將廁所寫成「次所」、洗手盆寫成「洗手盤」、儲物箱寫成「儲物廂」，另外兩次提及硬板床，其中一次寫錯為「硬版床」，仲有將鐵欄寫錯成「鐵闌」，畀網民嘲諷佢應喺獄中勤加讀書。

黃之鋒又喺書信中話自己獄中遇到旺角暴亂中犯暴動罪被判監兩年嘅麥子晞，寄語外界除要關注衝擊政府總部嘅學生領袖，亦要關心喺新界東北發展同旺角暴亂中嘅抗爭者，指佢哋同樣係為咗政治改革或對抗威權政體而面對監禁嘅政治犯。

另外，羅冠聰嘅女友袁嘉蔚亦喺Facebook透露探望羅冠聰嘅情況，袁指羅冠聰目前喺塘福懲教所嘅精神比喺荔枝角時好，福利官都好友善；佢又提到黃之鋒正喺壁屋懲教所學習圖像設計。

卓妮