中環出更：「學界菁英」搭起溝通橋樑
香港菁英會尋日舉行新一屆就職典禮，由常務副主席莊家彬（Albert）接替盧金榮成為新一屆菁英會主席，形象夠晒年輕活力，而新任常務副主席則為曾鳳珠。莊家彬仲話菁英會今年更特地成立由學生組成嘅「學界菁英」，作為年輕人同政府溝通嘅橋樑，希望透過唔同渠道向有關部門反映青年人意見。
呢日現身嘅除咗一班菁英會成員，仲有青聯主席郭永亮同百仁基金副主席、「鋼鐵公主」陳寧寧。Albert希望三個團體未來可以多啲合作舉辦大型青年活動，佢仲話菁英會今次特地搞搞新意思，搵人作咗首會歌做派台新歌，仲請埋藝人張敬軒同泳兒主唱。
講起菁英會今年成立十周年撞正就職前一日十號風球，Albert就話好感激天公作美，好在未有太影響就職安排。而做開旅遊生意的副主席黃進達（Jason）前日就冒住風大雨大返工，佢話每逢打風都一定要提早諗定旅行團安排，而打風當日更加事必要返公司處理大量臨時工作，解答客人查詢及疑慮。不過打風冇車點返公司？佢就話做得呢行一早預咗呢個情況，所以佢特登住喺公司附近，前日打風佢就可以行路返公司喇！
羅詠詩話打風啱打牌
Albert細妹莊家蕙都在場，仲有副主席廖偉麟、副秘書長陳振邦、副司庫顏麗儀、執委王詩雅同鄭燕華，以及菁英幗聚主席林淑怡等。之前擔任司庫時遇正市道不景嘅廖偉麟幫菁英會理財得宜，笑言今屆司庫將會好做啲。卓妮見珠寶設計師莊莎娜同菁英會靚女會員羅詠詩好啱傾，羅詠詩話前日打風最啱留喺屋企打牌，仲係三代溝通大好機會，平時唔會開口講嘅都可以喺打牌時傾到，覺得新一代唔想變低頭族都可以學吓打麻雀喎。
卓妮