大文豪魯迅曾經講過，中國改革難過登天，連搬張枱裝個火爐都要流血。今時今日中國高速發展，反而一向以效率見稱嘅香港爭拗多多，原地踏步，比魯迅時代嘅中國有過之而無不及，諗落都幾諷刺。
正如港鐵主席馬時亨尋日接受電視台訪問時話齋，依家喺香港搞大型建設，好容易走向非理性討論，好多時根本唔係提出意見，而係流於謾罵式政治。佢又寄語港人抓緊發展機遇，否則長此下去要付出沉重代價咁話。
冇錯嘞，廣深港高鐵香港段工程爭議正正係「非理性討論」同「謾罵式政治」嘅最佳典範。大家有眼見，反對派初時高舉「保家衞鄉」、反對鄉村拆遷嘅「義旗」，好嘞，講到依家冇人再講，佢哋又將龍門搬去所謂「一地兩檢」問題，又話「越境執法」，又話「割地賣港」，一味靠嚇。胡適嘅名言係「有幾分證據說幾分話」，反對派啱啱相反，先有政治立場再搵「證據」支持，近排搞到滿城風雨嘅「強力部門」越境擄人鬧劇，之所以漏洞百出，「劇情」犯駁都仍然炒作得起，就係咁解。
係人都知，「一地兩檢」本來係便民出行嘅措施，國際亦有成功先例可援，至於香港連接內地高鐵網絡帶嚟嘅經濟效益，更加明顯不過，可惜無論道理幾顯淺都好，有啲人心存成見，為反而反，尋日可以用「保家衞鄉」為藉口，今日可以藉「一地兩檢」過橋，聽日又唔知有咩新花臣。咪畀人批死，反對派要求政府再就「一地兩檢」諮詢公眾，無非係以拖待變，伺機再搞搞震嘅咋。
可能有人話，部分政客逢中必反，高鐵、港珠澳大橋一類連接內地嘅基建工程自然爭議不斷，舉步維艱，但事實係純屬香港內部嘅大型基建一樣係好事多磨，新界東北新市鎮、西九龍文化區、機場三跑等統統唔例外，特別係三跑，建成後可以搶走唔少內地周邊城市機場嘅生意，點解唔見嗰班仇中人士舉腳贊成？講到底，為反而反，一味拖後腿已經深植部分人嘅DNA，想改都改唔到。
沉舟側畔千帆過，病樹前頭萬木春。港人故步自封，先發後至，已經錯失唔少機遇，付出唔小代價。例如電子支付技術，香港嘅八達通曾幾何時領先全球，家陣已經畀內地拋離九條街！
日裔美籍學者福山曾經喺《歷史的終結》裏面斷言西方民主係人類「終極價值」，隨着近年英美歐等地陷入民粹亂局，福山亦修正講法，認為判斷一個政府好壞，「執行力」至係最重要，好心嗰班一味迷信西方民主萬靈丹嘅政客醒吓喇！