政情：小肥張唔放假 自稱錯誤示範
政務司司長張建宗（小肥張）曾經講過，任職勞工及福利局局長嘅九年內都未放過一日假，又稱自己「有得打呔就興奮」，講到好似好自豪。不過，尋日佢出席電台節目時就兜番話，自己長工時習慣係錯誤嘅例子，唔值得推介。咁啱新任勞福局局長羅致光早前話，自己「六點九」離開辦公室已經算遲，唔知小肥張突然「反口」係咪怕外界將兩人做比較，所以要為羅致光解圍呢？
指作息平衡好重要
小肥張仲話，自細讀書嘅目標就係加入政府，至今入政府四十五年，覺得終身無悔喎。對於佢被指係工作狂，佢就解釋話自己唔係冇放過假，只係近廿年因為職務及工作需要，先至冇放假。不過長工時習慣唔值得推介，員工權益及作息平衡亦好重要。
講起佢嘅金句「有得打呔就興奮」，小肥張自爆曾經有同事喺環保日時講笑，話佢當日冇得打呔，一定唔興奮喇。小肥張又喺節目中感謝太太對他嘅體諒。小肥張如此賣口乖，唔知道張太又係咪受落呢？