政情：陳肇始沖奶茶 每杯值一萬
食物及衞生局局長陳肇始尋日喺一個茶王比賽上披甲上陣，喺香港餐飲聯業協會會長黃家和嘅教導下，沖調出六杯「局長奶茶」，每杯價值高達一萬港元！
點解咁貴？原來主持人玩即興，叫人用一萬蚊認購，款項全數捐予慈善機構。結果反應熱烈，六杯矜貴嘅「局長奶茶」不消一分鐘已被認購一空，善長包括香港工業總會主席郭振華、現代管理（飲食）專業協會會長何竟成及中華廠商聯合會會長李秀恒等人。
歎過大半杯「局長奶茶」嘅郭振華大讚奶茶「好味，夠熱」，笑稱可能係因為奶茶內有局長嘅「熱情」，所以「熱辣辣」。何竟成話一萬蚊一杯奶茶非常值：「可以飲到局長親手沖嘅奶茶，又可以做善事，值！非常值！」