政情：張琪騰自駕遊英 四日食三「牛肉乾」
觀塘區議員張琪騰（Jack）早前同太太去英國度蜜月，專程喺當地租車自駕遊，點知當地嘅警察有特別嘅抄牌方法，搞到阿Jack只係揸四日車，就已經食咗三張「牛肉乾」，其中有一張仲係返咗香港先至收到通知喎！
多次泊錯位
阿Jack細數被抄牌經過，第一次係唔小心泊咗殘疾人士嘅車位，第二次泊車只係喺教堂附近行個圈，上番車前專登睇一睇有冇告票夾咗喺水撥度，正以為逃過一劫時，先見到司機位正前方貼咗張告票。第三張牛肉乾最特別，係返到香港先收到租車公司通知，話有閉路電視影到佢喺巴士站違例泊車，所以除咗罰款之外，仲要收手續費添！其實阿Jack當時只係停埋一邊睇吓地圖啫！
雖然狂食罰單，但阿Jack就覺得當地抄牌機制幾好，香港都可以倣效當地用閉路電視抄牌嘅做法，解決巴士站違例泊車嘅問題喎。