政情：林子健案白鴿元老潛水 卿姐出頭撲火
報稱被擄走兼遭禁錮虐打嘅民主黨（白鴿黨）成員林子健，結果反被控誤導警務人員罪。一眾當初高調力撐林子健嘅白鴿黨元老，如外號「李漢奸」嘅李柱銘等人，事後潛晒水，黨主席胡志偉焗住出嚟交代，但就講到唔清唔楚，欠缺說服力。加上黨內中委早前就「信與不信」爆內訌，一盤散沙下，白鴿黨遲遲未能止血，拖累該黨民望插水。一直與事件保持距離、講到明同林子健唔熟嘅前黨主席劉慧卿（卿姐），尋日評論事件直認，事件已變成白鴿黨嘅危機。
林子健一案意外點着白鴿黨多處火頭。其中黨內元老李漢奸、何俊仁及該黨立法會議員林卓廷等人，高調為林子健召開記者會，無異係「引火自焚」。咁仲未夠，佢哋開記者會前未有通知黨內中委，惹來中委不滿，事後更有資深黨員「提醒」必須相信黨友，力阻黨內理性聲音。
未釋疑慮 白鴿黨民望跌
至後來閉路電視片段流出，證實林子健唔係被擄走，火勢旋即喺黨內外一發不可收拾。李漢奸等一眾元老未有即時救火，反而轉身「潛水」，至今仍未見蹤影。胡志偉被迫頂硬上，卻撲火不力，草草交代就算數，未能釋除公眾疑慮。結果火勢繼續蔓延，白鴿黨民望亦應聲插水，更被嘲笑「跟車太貼」。
一直與事件「保持距離」嘅卿姐，早幾日已明言同林子健唔熟，亦未有出席撐林子健嘅活動。佢尋日再公開評論事件，雖然認同事件已演變成白鴿黨嘅危機，但就試圖為黨友撲火，指有份出席記招嘅何俊仁當時係真正相信林子健嘅說法，若事後證實有何俊仁唔知道嘅事，白鴿黨會向市民坦誠交代。
林昨鬼祟出院 行蹤成謎
咁佢信唔信林子健呢？佢就話依家警方正進行調查，稱「我又話信，佢又話唔信，咁冇乜意思囉！」佢強調希望警方可公平、公正咁調查。雖然卿姐嘅回應同胡志偉分別不大，但明顯感覺較有說服力。
卿姐啱啱退下火線一年，黨內就搞到火頭處處，身為起火源頭嘅林子健尋日已鬼祟出院，行蹤成謎。事件繼續發酵下，唔知使唔使卿姐復出，拯救一眾即將烤成燒鴿嘅黨友呢？