中環出更：張秀賢無意爭港島區議席
坐緊監嘅香港眾志秘書長黃之鋒及主席羅冠聰，五年內不能參加選舉，由於羅冠聰被取消立法會議員資格而空出嘅港島區補選議席或要拱手讓人。盛傳香港中文大學學生會前會長、議政平台「立言香港」召集人張秀賢有意參加補選，唔知佢會唔會趁機轉區，爭奪港島區議席？
張秀賢尋日出席活動時話，港島議席原屬於眾志，政治倫理上應由眾志派人參選，無論佢哋派咩人出選，嗰個人知名度係高或低，佢都會支持。佢又話自己如果參加補選，都係去新界東嘅機會大啲。唔知佢係想攞青年新政梁頌恆定係社民連梁國雄嘅議席空缺？
官司在身 「冇得擔心咁多」
近日律政司就多宗社運人士抗爭行動案件覆核刑期，令多名社運人士被判囚，張秀賢亦因參與佔領行動而有官司在身。被問到會唔會擔心入獄，同埋因為入獄而無法參選，他就話「冇得擔心咁多」，會把握現在，做好自己；又話選民投票選議員時，唔係睇一個人係咪將會入獄，而係考慮佢嘅能力，強調唔應該剝奪政治犯或任何人參政權利。咁聽落，似乎張秀賢參選嘅意志頗堅定，只怕到時身陷囹圄，有心都冇力喇！
卓妮