中環出更：撇開性別定型 IT界巾幗揚眉
男女平等已經提倡咗多年，不過仍然有唔少人會職業歧視，即係為職業性別定型。城市女青年商會早前舉辦全港時尚專業女性選舉，選出八名傑出女性，工程及科技學會香港分會委員何臻言（Justina）都係得獎者之一。講起早前有工程師發表女性唔應該從事資訊科技（IT）行業嘅言論，結果被解僱，Justina都有留意相關報道，仲話絕對唔認同。
Justina話，IT業確以男性居多，佢認為較少女性入行，係因為唔少女仔讀書時唔敢讀理科，呢啲係信心問題，與能力無關。佢話男女嘅思維同專長各異，鼓勵IT行業嘅女士要多啲企出嚟，話畀人聽有好多女性做IT喎。咁啱今次提名Justina參選嘅前得獎人李煥明，都係IT界嘅靚女高層。
籲為興趣毋須理他人目光
中華廠商聯合會副會長徐炳光女兒徐詠琳（Jennifer）、鋼琴家黃子芳都係得獎者之一。Jennifer曾經喺德國汽車公司做設計師，佢話一早就感受到性別定型，但佢覺得只要自己有興趣就毋須理會他人眼光。佢話近年女性駕駛者增加，令到女性汽車設計師待遇有所改善，因為佢哋較了解女性需要喎。
除咗職業，樂器都存有性別定型，好似鋼琴、長笛等就多數被人認為女性較擅長。不過黃子芳話，唔少知名鋼琴家係男士，無論激昂定柔情嘅樂曲，男女鋼琴家都能夠彈奏得到，認為兩性差別只在於體能同肢體動作上啫！
卓妮