要聞港聞
政情:出書講玩具業 林亮唔夠喉
林亮(右)及太太戚小彬齊分享傳記面世嘅歡欣。(溫國佳攝)
以製造塑膠小黃鴨而揚名,有「中國變形金剛之父」之稱嘅林亮,佢嘅傳記《香港玩具人林亮》面世。佢同負責執筆嘅太太戚小彬尋日齊齊出席新書發布會。林亮囝囝、立法會議員林健鋒同個孫林凱章都有捧場。林亮話,今次出書有好多感受,有喜悅,又有唏噓,亦都意猶未盡,仲想寫多兩本,講多啲玩具業嘅「鹹苦」,又想講吓自己同爸爸嘅故事。
九十幾歲嘅林亮傳奇一生講幾日都講唔完,講起投身玩具業嘅原因,佢話自己細個時因為日軍侵華打到嚟香港,殺咗爸爸,當年媽媽就同佢講,日本仔造玩具賺嘅錢就係用嚟造飛機大炮打中國,自此佢就立志大個仔後要造玩具喇。
自爆試過瞓棺材舖
不過投身玩具業前,林亮都打過唔少工,仲試過喺棺材舖任職。由於冇地方棲身,佢夜晚就喺棺材舖瞓,因為費事「朝拆晚行」,索性就瞓喺棺木入面。佢話自己百無禁忌,又唔係冒犯人,所以冇驚過喎。
第一手消息請下載on.cc東網iPhone/iPad/Android/Windows Phone Apps