「廟小妖風大，池淺王八多」，香港郵政衙門細過人，醜聞卻多過人，三日唔埋兩日就嚟單勁嘅，正正係最完美典範，呢嗱，話口未完又出事啦！
香港郵政合約員工權益會尋日大控訴，聲稱內部涉嫌歧視殘疾員工，包括有主管以「崩嘴」取笑兔唇員工、無故指摘聽障員工犯錯、代佢哋寫辭職信逼人辭職。有員工更加反映，曾有主管開會嘅時候口出惡言，話以往工作效率低嘅同事會被稱為「垃圾」，依家為表「尊重」，要改稱佢哋為「傷健人士」，你話係咪離晒大譜吖！
查實有關亂象兩年前已經開始，員方亦一直有向管理層反映，點知對方闊佬懶理，大事化小，唔係賴「個別事件」，就係話「一場誤會」，從來冇認真跟進。講真，涉事員工屬於弱勢社群，佢哋都驚畀人報復，如果唔係忍無可忍，斷估唔會走出嚟公開爆大鑊。
上述指控係咪屬實，仲要查過至知，但香港郵政管理千瘡百孔，紀律蕩然，卻係鐵一般嘅事實。好似呃鐘補水問題咁，香港郵政處理郵件數量不斷萎縮，人手維持不變，每年超時津貼不減反增，擺明有人出蠱惑，卻從來冇見過有人被問責；至於員工蛇王踢毽、將郵車泊埋一邊瞓覺玩手機等醜聞，更加係長爆長有。成個香港郵政無王管成咁，咩衰嘢都有可能發生。
好嘞，家陣有人涉嫌殘疾歧視，唔該平機會快啲介入，查個水落石出。大家有眼睇，該會曾經喺捕風捉影情況下，僅憑所謂「市民投訴」，指控報章報道歧視殘疾人士；更試過將報章告上法庭，結果唔係草草終止調查，就係敗訴收場，白白浪費納稅人公帑。平機會儼然以殘疾人士權益守護神自居，呢鑊嘢點都冇理由置身事外啩？
不過大家都係唔好抱太大期望。有團體統計平機會舊年收到約六百宗投訴，提供法律支援嘅只有十六宗咁大把，試過有演藝學院教授因替被性騷擾嘅學生出頭，不獲校方續約，向平機會投訴不獲受理，結果要自行入稟法院討回公道。平機會出晒名不務正業，唔該做嘅亂做，該做嘅又唔做。游、梁「小學雞」立法會宣誓發表辱華言論，全城震怒，平機會被指因內部有人施壓，終止相關調查工作，難怪該會公信力長期喺法定機構之中吊車尾。
當然喇，烏鴉咪笑豬黑，講到不務正業，打壓媒體，香港郵政同平機會都係一擔擔。平機會今次會唔會開快勞調查殘疾歧視醜聞，全港市民金睛火眼（目及）到實，咪諗住官官相衞，側側膊唔多覺吖！