政情：八網難逃：考咗兩次 陸頌雄終攞到車牌
雖然香港嘅公共交通都相當便利，但唔少人都會考番個車牌傍身，以便不時之需。立法會議員陸頌雄（Michael）考咗兩次車牌，尋日終於成功過關，之後可以做「柴可夫」車埋老婆去遊車河喇！
Michael尋日喺社交網站Facebook公布終於考到車牌，佢私下透露自己上年七月已報咗名學車，所考嘅自動波私家車算係較易考嘅車牌，但自己第一次考試就因為入線時「責界」，同埋唔記得咗要睇「盲位」所以先至會肥佬喎！好彩有考生要改考期，所以佢兩個月後就可以補考兼順利過關。
吳永嘉跟隊遊車河
仲記得佢未考到車牌，喺舊年已睇中咗部二手車，仲好心急咁畀錢買咗先，所以之前都係畀老婆揸住先，依家佢終於可以自己做番「柴可夫」喇！之不過，工業界議員吳永嘉（Jimmy）收到風之後，就即刻上Fb留言，話要跟隊齊齊去遊車河喎，但Michael就好謙咁話自己係新手，要多啲請教吓Jimmy就真。