政情：教你做特首副官
相信唔少人都曾喺電視螢光幕見過一個貌似影星狄龍嘅男子，經常喺特首身邊出現，佢正正就係特首副官劉志堂，而佢喺今日就會作退休前休假，將加入深水埗明哥嘅義工行列。到底特首副官做啲乜？原來除要安排G4（要員保護組）為特首提供貼身保護、天氣酷熱出席戶外活動時特首着乜嘢衫，就連主持同司儀都要做埋。
警司劉志堂話，佢嘅工作主要分為保安、活動同禮儀三大範疇。喺活動方面，若有主辦單位邀請特首出席典禮，佢會盡量喺一個月前相約對方了解詳情，包括場地安排等，若預期有激烈示威活動，會先要求大會禁止參加者攜帶大型示威物品進場，防止有人「掟嘢」；若天氣炎熱又係假日嘅戶外活動，會問清楚係咪可以着簡單便服，大會有冇提供Ｔ恤。咁都不特止，仲要負責為特首外訪訂購機票，逢有紀念日或授勳儀式，佢仲會主持活動同擔任司儀添，真係一腳踢o架！
加入警隊卅五年，佢曾為四屆特首服務，包括做過特首保安主任。佢認為任特首副官「最緊要細心，唔識問到識，因為唔錯得！」