政情：建制無大將放生邵家臻續掌福利

有機會同羅致光交手

據悉建制內部陣營初步評估，根本冇合適人選同邵家臻拗手瓜，加上有關方面對邊個出任委員會主席冇強烈意願，實在無必要挑動非建制派嘅條件反射，換言之，勞工及福利局局長羅致光料好大機會同邵家臻交手，仲記得邵家臻曾批評羅致光同社福界立場有距離，預料佢哋勢必會擦出火花。

福利議題爭議性有限

距離立法會十月復會尚有約一個半月，建制派內部開始醞釀新一個立法年度委員會正副主席人選，面對立法會內新形勢，所指嘅係非建制派有四人被取消立法會議員資格，喺此消彼長之下，建制派理應有更大空間去爭取更多委員會正副主席，但據聞建制派無意「趕盡殺絕」，只要非建制派有商有量，唔打算「冧友」去全面開戰，建制派願意開放部分委員會正副主席由非建制派「揸莊」。

據悉其中一個「示範單位」就係福利事務委員會，剛過去一個立法年度由邵家臻同民主黨（白鴿黨）鄺俊宇任福利事務委員會正副主席，雖然早前有資深建制派公開對邵家臻由議會新丁「升呢」委員會主席，以及邵家臻主持委員會做法有意見，但基於建制派內「蜀中無大將」，加上福利議題爭議性有限，預料會放手畀非建制派自決人選，因此，邵家臻續任福利事務委員會嘅機會睇高一線。

不過，建制派有啲底線始終唔可逾越，部分委員會主席係必不可失，包括政制事務委員會主席、保安事務委員會主席等，外界一般相信，如無意外會分別由建制派班長廖長江，以及建制派副班長陳克勤續任壓場，非建制派如對以上委員會位置有不設實際嘅幻想，隨時會一子錯滿盤皆落索，原本手到拿來嘅部分委員會位置都可能成為犧牲品。