中環出更：捲「打龍通」風波 周浩鼎學識感恩
立法會議員周浩鼎（Holden）近幾個月少咗曝光，未知係咪同早前喺立法會調查UGL事件委員會中，被揭與時任特首梁振英「打龍通」有關。Holden就否認轉玩低調，認為自己遇上睇唔過眼嘅事依然會發炮，所以絕對唔低調咁話，而佢亦好正面咁睇番件事，直言感恩遇到事件令佢可以避免再犯，而過程亦都深深感受到黨友及唔少同事嘅支持。
旅行發現東南亞發展潛力
由於Holden係循有「超級區議會」之稱嘅區議會（二）功能界別進身立法會，必須喺區議會先有參選資格。雖然「雙料」議員唔易做，但佢就冇考慮更改選區，改循進出口界接師傅黃定光棒，仲話會繼續努力服務東涌，好似東涌近期有街市翻新重開，佢都好關心有冇加價嘅情況。
早前Holden趁立法會休會去咗峇里島旅行，旅程中佢感到東南亞有發展潛力，可以同香港互惠互利。再加上訪港旅客有唔少來自泰國同菲律賓，佢認為香港不容忽略東南亞中富裕嘅一群，所以未來會着眼同東盟合作嘅議題。
卓妮