工程師考私人直升機牌 一圓飛行夢
【專案組報道】不是富二代、亦不再年輕，但因對天空有一種莫名的仰慕，工程師Peter在卅八歲才圓了他的飛行夢。在香港，除非有錢，否則只能加入民航公司才能成為機師，但Peter選了第三條路。因為自小的着迷，Peter公餘時間考取私人直升機駕駛執照，可以自由在香港上空翱翔：「其實飛行夢都唔係離普通人好遠。」
曾膽粗粗投考民航機師
「我細個住喺石硤尾，以前見到啟德（機場）好多飛機，飛得好低，好好睇。」不過，喜好並未能成為他夢想的終身職業，中學時曾膽粗粗投考過民航機師，結果無功而還。因為家境並不富裕，他畢業後成了與飛行並不相關的工程師。
Peter一直離不開對天空的仰慕，三年前，在一次偶然機會首次坐上直升機，喚醒了當時三十五歲的Peter的飛行夢，「有一次我帶啲年輕人參加一個可以坐直升機嘅活動，咁啱有一個位剩，咁就突然有個機會喺香港上空飛一轉，嗰次係我第一次坐直升機！」就是那次，他希望可以在香港成為一個直升機師。
抬頭就能飛？談何容易。有別於二十出頭的年輕全職機師到外國學飛，選擇在香港考牌，要把握公餘時讀書、考試，用盡下班後的一分一秒實踐。Peter笑說：「雖然平日工作壓力已經好大，但鬼叫自己鍾意，幾辛苦都唔緊要，反而愈辛苦愈要努力，無論係本身工作定考牌都好，因為係自己想做嘅事。」
至少四十小時飛行訓練
投考私人直升機的駕駛執照，要有至少四十小時飛行訓練，通過七科筆試和飛行試，包括導航、飛行法律、天氣變化等課程，才能獨自飛行：「第一次solo flight（個人飛行）真係好緊張，當時只係顧住點控制架機，腳踏、控桿，每一個步驟都要好小心。落到地先肯定，原來自己真係可以一個人飛上天。」