港產官僚成日被人話「唔死人冧樓唔做嘢」，次次爆親大鑊至臨急抱佛腳，加強執法巡查，不過啱啱工廈劏房三死慘劇有啲唔同，除咗指定動作外，林鄭仲實牙實齒話要有「新思維」解決工廈問題，係咪真係有料到，仲要睇過至知。
林鄭係咁講嘅。佢話政府處理工廈偏離工業用途嘅問題多年，希望可以加快整棟工廈拆卸重建改裝，已經責成多個部門跟進工廈違規情況，包括要求發展局重新審視活化工廈等政策，希望喺兩、三個月內可以公布詳情。又話會研究將工廈低層放寬工業以外嘅用途，以及有咩政策可以幫工廈業主整合土地業權，例如降低強拍條例申請門檻，現階段已聯絡多個成功改裝工廈個案，要求業主以低於市值租金，將部分已改裝樓層租作文化藝術以及共享空間用途。
講真，有需求就有市場，好似今次出事單位咁，就被年輕人租用作為工作室；另一方面，同一樓層亦被劏作多個單位，包括Band房、工藝室等，五花八門，無奇不有。政府成日鼓勵文創產業，家陣咁多後生仔女因為捱唔起貴租，焗住連工廈劏房都照殺，呢類劏房安全、消防隱患處處，年輕人為求追夢，結果變相搵命博，都咪話唔諷刺。
呢嗱，呢個正正就係曾蔭權爵士時代推行活化工廈，最為人詬病嘅地方。事關工廈「活化」之後變身美輪美奐嘅商廈有之，變身高級酒店有之，租金水漲船高，原本有個竇口嘅年輕人反而被趕絕，政府變相幫倒忙。港府鼓勵業主以低於市價租畀藝術團體，可謂用心良苦，問題係在商言商，如果冇適當誘因，憑乜要求業主響應？
呢個只係問題嘅其中一方面。正如有學者指出，家陣規管工廈工作政出多門，包括城規會、地政總署、消防處、食環署，你知喇，三個和尚無水飲，多人管即冇人管，各個衙門左手唔知右手事，往往令工廈租戶無所適從。舉個例子，發展局早前建議放寬工廈低層經營藝術工作室，但相關手續複雜到冇人有，有工廈樂隊表演場地遭當局取締，引發爭議，正好說明問題。
當局肯開闊思路，總好過食古不化，翹埋雙手乜都唔做。但無論點講都好，安全問題特別係絕對唔能夠妥協，人命傷亡血的教訓，一次都嫌太多，當局強調兩條腿走路，同時加強監管及檢控違規工廈，千祈唔好噏咗就當做咗。
始終都係古人講得啱，為政不在多言，顧力行何如耳，新官上任講到曉飛都冇用，唔做番一兩場好戲省靚招牌，講乜都嘥氣！