政情：八網難逃：陳恒鑌睇流星雨 有晒策略
早幾日香港可以睇到英仙座流星雨，吸引咗唔少香港人去睇，搞到多處觀星熱點現車龍添！立法會議員陳恒鑌（Ben）都一樣唔執輸，當日去咗大美督睇流星雨，雖然所見嘅流星唔多，但就大讚當晚感覺年輕，仲透露需要有攻略先可以睇得輕鬆o架！
一早喺大美督預約餐廳
阿Ben深明香港人鍾意熱鬧，所以早就決定當日去大美督食晚飯，仲一早預約埋餐廳，可以食飽直落睇流星雨，唔怪之得佢搵到位泊車，仲可以揀定個靚位睇流星喇！而佢到凌晨離開時，就見到有連綿不絕嘅車龍，估計要起碼一個鐘先入到去大美督，難怪佢會大嘆參加大型活動要有攻略。
大讚當晚嘅感覺好年輕
其實佢當晚係同友人去睇流星，仲話當晚感覺好年輕，唔知係咪諗起以前同朋友玩通宵嘞！雖然今次唔係同屋企人去，但佢就話囡囡好想跟埋去，但因為太夜所以先唔成事。
不過，佢已經應承咗囡囡，會考慮喺冬天同佢睇雙子座流星雨咁話，睇嚟囡囡遺傳到佢對天文嘅興趣喎。