政情：內地高薪搶菲傭劉黃寧達未驚過
早前有消息話內地多個城市計劃開放招聘菲律賓外傭，月薪可高達一萬五千元，唔少僱主擔心會掀起本港菲傭嘅轉職潮。但珠寶設計師劉黃寧達（Leta）就話唔驚，事關喺內地打住家工可能好繁重、工時長，唔會好似香港家庭咁簡單，加上佢嘅家傭已經幫佢打工好多年，唔擔心佢會因為人工高就去陌生嘅內地工作。
帶家傭去瑞士 困難重重
其實好多歐洲國家都冇開放外傭，Leta話好似英國、瑞士等國家，對待跟隨僱主入境嘅女傭審批都好嚴，記得當年佢個女仲細，但係瑞士點都唔肯批准帶家傭，話除非有需要照顧嘅長者先會放行。
有次Leta有長輩同行去瑞士，於是試吓申請簽證，又遇上重重難關，領事館見完僱主又再單獨見傭人。咁仲未夠，同一個家傭去咗一次後，下次要隔幾年後先會再批准入境，難怪佢諗起就好頭痛。