政情：拍片硬銷高鐵 「傻」啟明放笑彈
立法會議員何啟明早前拍片「啟明上廣州」，親身證實喺廣州可以玩社交網站Facebook，掃除部分對廣深港高速鐵路香港段嘅疑慮。佢近日再上載拍片花絮，除咗無端端喪笑、食螺絲、筆無墨等博觀眾一笑外，更不惜扮答錯去硬銷高鐵，認真豁出去。
花絮片末段，何啟明喺片中被問到「香港去深圳要四十九分鐘、深圳去廣州要四十七分鐘，咁香港去廣州最快要幾耐？」
扮唔知去廣州要幾耐
其實港府喺公開場合已多次宣傳日後高鐵香港段落成，由西九龍總站至廣州只需四十八分鐘，何啟明又點會唔知，但佢仍「扮傻」答九十六分鐘，再由同行者糾正，為撐高鐵他都去得幾盡。
另外，片中又播出蝦碌鏡頭，例如佢將聽出耳油讀作聽出耳「流」；寫字嗰陣先發覺筆無墨，大叫「冇料到嘅」，笑料百出。