政情：上任滿月食老本羅致光民望急瀉

仲記得羅致光嘅副手、勞福局副局長徐英偉本月初履新之時被傳媒考起，講唔出最低工資水平，羅致光要急急開腔為對方解畫，莫非羅致光呢個「護航」舉動就係民望「被燃燒」嘅元兇之一？再講，好彩佢退出民主黨（白鴿黨）退得快，否則近日發生佢前黨友林子健指稱被擄，事態發展到警方以涉嫌誤導警員拘捕林子健一事，肯定燒埋佢身，真係食老本都唔掂呀！

港大民研計劃於本月二日至七日，成功以電話訪問八百一十七名市民，十三名問責局長中，包括羅致光在內共有十名問責局長支持率下跌，只有三名問責局長支持率逆線上升，即運輸及房屋局局長陳帆、教育局局長楊潤雄同民政事務局局長劉江華，上升介乎兩個百分點至五個百分點。

無局長支持率淨值逾五成

其中有份就廣深港高鐵香港段一地兩檢方案解畫嘅陳帆，支持率及反對率分別為三成及一成二，支持率淨值為正十八個百分比；至於最近多次就委任蔡若蓮為教育局副局長爭議拆彈嘅楊潤雄，其支持率升至三成三，但同一時間反對率則增至一成八，換言之，最新支持率升幅不足以抵銷反對率升幅，加上最近屯門興德學校爆出「影子學生」風波，楊潤雄民望會唔會再受挫，就要留待下回分解。

如按支持率淨值去排名，新政府冇一個局長嘅支持率淨值係超過五成，民望最高嘅局長係商務及經濟發展局局長邱騰華，支持率淨值為正三十五個百分比，緊隨其後係食物及衞生局局長陳肇始同公務員事務局局長羅智光，支持率淨值分別係正三十四個百分比及正三十三個百分比，民望急瀉嘅羅致光則以支持率淨值正二十四個百分比，排名「梗頸四」。