中環出更：畢業搞初創 陳百里蝕入肉
政府近年力推發展初創企業，原來商務及經濟發展局副局長陳百里早年喺美國完成學業返港後，亦曾搞過幾次初創企業，結果因欠缺經驗，蝕本而回。
喺陳百里眼中，籌集初創資金係最容易嘅，因為政府經常提供相關資助，再問親戚借少少已成事。佢曾喺香港搞醫療同納米生物科技，資金同團體萬事俱備，卻欠人脈同經驗，「都唔知道應該點打入市場，入到市場又唔知點保持。」結果試咗幾次都失敗，反而令佢有所覺悟：「搞初創要喺頭兩、三年內生意翻幾番，否則應該五年內結束止蝕。」
佢坦言假如社會早啲推出聯繫商界同初創企業嘅交流平台，「自己就唔需要走咁多冤枉路」，又指香港相對欠缺「風險基金」，即由大財團注資予初創發展嘅模式，但香港嘅創新科技近年大為改善，有信心日後能夠引入更多風險基金。
教路買專利發展
對於青年搞初創，佢以過來人身份畀「貼士」，指初創唔一定要做「上游」，即由零到設計出一件產品或一套模式，應考慮做「中、下游」，即買下專利發展。佢話香港有穩健金融制度同市場，行中下游模式有優勢，仲話自己早年都係洽購大學嘅研究成果版權，強調初創資金有限，目標方向必須清晰先能夠成功。
卓妮