中環出更：客家美食多曾智明首推蘿蔔丸
客家人係香港開埠前其中一批最早的香港原居民，而唔少城中名人都係客家人。香港客屬總會（客總）早前舉辦第三屆會董會就職典禮，主席吳惠權上任接替上屆主席梁亮勝之位，執行主席曾智明就話，雖然香港有唔少客家菜，但有部分菜式依然都係出面冇嘅，好似蘿蔔丸咁。
的確魚蛋就成日見，蘿蔔丸就冇乜地方有得賣。曾智明解釋蘿蔔丸係由一條條蘿蔔絲整成一粒丸狀再蒸熟，好好食o架喎，連保安局局長李家超都話未食過，曾智明仲話下次要請佢食添！
吳惠權釀豆腐最拿手
主席吳惠權就話好多客家菜已經融入咗我哋生活當中，好似最出名嘅鹽焗雞、梅菜扣肉同客家釀豆腐咁，佢自己都識得煮o架，釀豆腐仲好拿手咁話。
榮升榮譽主席之一嘅梁亮勝就好懷念客家人嘅童年單純簡樸，笑言細個與大自然為家，嗰時冇手機，小朋友隨手拎起兩支竹，撩下牆角啲蜘蛛網就可以變成一支捕獵工具，黏力特強，細至蟋蟀大至雀仔都會被黐實。有啲小朋友仲會一人捉一條魚放喺個兜仔入面鬥魚，依家就梗係冇呢啲嘢啦，個個都掛住玩手機。
同場仲有客總榮譽主席曾憲梓、楊釗，榮譽顧問藍鴻震、張德熙，世界客屬第二十九屆懇親大會聯席主席余鵬春同香港中華總商會永遠榮譽會長霍震寰等。罕有現身嘅曾憲梓到場後即被大批客家鄉親熱情要求合照，而余鵬春就話世界各地都有好多客家人，嚟緊佢哋懇親大會將聚集幾十個地方兼過百個會嘅客家人，仲會首次舉辦客家盃賽事，非常難得。
卓妮