一場夏季流感，唔止搞到公立醫院倒瀉籮蟹，最慘係死得人多，至今已奪去逾三百條人命，比沙士更加誇張。好明顯，公營醫療體系病入膏肓，再唔對症下藥，徹底改革，爆煲都似。
冇錯，今次流感疫情反常，感染個案突破一萬宗，較去年同期勁升九倍，嚴重個案嘅死亡率高達七成，的確係殺人不見血。但點反常都好，公院應付流感理應有晒經驗，照計冇理由手忙腳亂啫，點知事與願違，各間醫院嘅急症室同內科病房全部淪陷，搞到醫管局無計可施，要破天荒向私院借調床位。家陣話就話疫情見頂，感染人數回落，但多間醫院嘅病床使用率依然超過百分之百，醫護人員依然做到有氣冇碇抖，壓力依然未解決嘅咋。
嗱，有立法會議員就講得啱嘞，港府應付呢場疫情只知頭痛醫頭，腳痛醫腳，唔夠床位咩，向私院買位囉；唔夠人手咩，徵召兼職醫生囉，挖東牆補西牆，結果頂得到一時，頂唔到一世。講嚟講去，最大問題咪就係公院人手嚴重不足囉，醫管局仲要肥上瘦下，資深專科醫生走去做行政工作，前線崗位又多以臨時職位充撐，資源完全錯配咯喎，亂象叢生就係咁解。
仲有呀，今次疫情之所以咁嚴重，同本港人口老化有直接關係。正如公院前線醫生話齋，多達七成七嚴重流感患者係老人家，佢哋抵抗力弱，好容易一病不起。最弊係長者人口不斷增加嘅同時，醫生供應遠遠追唔上需求，早排食衞局先至做過報告，話醫生人手荒將持續惡化到二○四一年喎，空缺仲要係千千聲嗰隻喎，十個煲七個蓋，問你點頂。
正所謂，知病之所起，方能治之。港府明知問題所在，好應該撥亂反正喇，殊不知當局所謂嘅應對措施來來去去三幅被，講多過做，有冇誠意解決人手荒問題，路人皆見喇。鬼咩，港府向來視醫療福利為包袱，最想就係將個波卸畀私營市場，推出自願醫保係一例，急症室大幅加價又係一例，近年私院愈開愈多，當局任由公院人手被挖都冇反應，你急佢唔急咁款，話唔係專登都冇人信喇。結果係點？結果咪將中產人士逼向私人市場囉，基層人士就大排長龍繼續輪候鬥命長囉，有人話港府做法近乎謀財害命，真係一語中的o架。
講起就激氣，港府貴為全世界最有錢嘅政府，根本唔應該存在看病難呢個問題，但事實係唔少病人小病拖到變大病，大病拖到變絕症。講到尾，都係拜前特首曾蔭權爵士嫌貧愛富所賜，學人搞咩醫療產業，卒之令公私營醫療進一步失衡，遺害至今。千古罪人呢個名，曾爵士坐實嘅嘞！