我有正能量：天馬行空 展現無限可能
由製作藝術品到公開展覽，為期三個月的工作坊有賴兩位來自環保團體「拾坊」的義工導師從旁協助，除了收集廢棄物料，他們又在課堂上循循善誘，引導學員發揮創意，成功令學員和社會大眾明白物件除了本質的用處，其實還有無限可能性。
「我哋事前真係無諗過佢哋對藝術創作咁有興趣。」導師Dexter指，智障人士一般給予社會大眾較難控制和必須跟從指令行事的印象，但在課堂中，Dexter選擇給予充分的自由度，讓參加者自行創作，結果令他喜出望外，「原本都驚自由得滯會完成唔到作品，點知成班學員唔單止完成到，而且件件作品都唔同，好有創意。」
作品印象深 市民留言打氣
另一位導師Jessica則指藝術品以廢棄物料作材料，成功提高一班學員的環保意識，「紙皮同報紙都係執番嚟，連啲紙黏土都係用廢紙同膠水溝成，佢哋明白原來呢啲執番嚟嘅嘢全部都仲有用，唔係垃圾嚟嘅。」充滿環保元素的作品早前於荃灣一個商場展出，作品深受歡迎，亦令參觀人士印象深刻，紛紛在留言簿寫上祝福和加油打氣的字句。
